Cöllnisches Stadtbuch (Signatur A Rep. 510 Nr. 1), Folio 6 recto
[Abgaben der Bäcker, Eid der Bäcker. Eintrag über die Schneider]
|
pistores
[D]y Beckere desser Stad Colen
dy geven alle verndel yares
Islich XII denarios thu tinsze, wuͤ ve-
le dat der ys. Unde wenne
dy meystere uth den backwerc-
ke den verndel tinsz In eyn
Sammpt deme rade bringhen,
So geft em dy rad ok thuͤ
drankghelde weder umme des
willen, dat sy den tinsz destu
bat van oren medekumpennen
vorderen, yo alle weghe eynen
groschen, dat synt Jerliken
IIII groschen.
[D]yt ys guͤt thu wetenne,
dat alle dy yenne dy In den
wercken gheboren werden ne-
melich In deme backwercke,
In deme Schuwercke unde
In der lakenmeker wercke,
willen sy der ennich wynnen,
dar van gewen sy deme rade
nicht wen VII groschen unde deme
Schrivere III denarios Sust endorven
sy weder van Borgerschap noch
van ander zake wegin deme
rade nicht geven, wen deme
Schrivere geven sy III denarios dy Bor-
gerschap thu thuschriverenne.
Ever ys he In deme werke nicht
gheboren unde will dat wynnen,
So geft he dar van XV groschen
[S]Equitur Juramentum eorum
in acquisicione operis.
|
Juramentum pistorum.
[I]k wil deme rade horsam wezen
unde mynen medekumpennen ghe
truwe und ghewere | Ok zo en
wil Ik mynen medekumpen nicht
uthmyͤden uͤth der wonunghe | dy
he ghemydet heth. Weret ok, dat ik
koͤrne ghekoft hadde up den maͤrkt
unde myner medekumpenne eyͤn | daͤr
thu qweme | unde bergherde dat
koͤrne halff thu beholdenne alze ik
dat ghekoft hadde | dat schal Ik
em med willen lathen halff werden.
Ok enschal ik em nicht synen knecht
entmyͤde | unde schal lovelich brot
Backen van weͤten unde rogghen na
der tyͤt unde kopes des kornes, dat
my got helpe unde seyne hilighen
[S]equitur de censu pannificium
|
Notabile van den snydernn.
Tu merkene das dy Schrodere in gewynnunge ores werkes, he sy in deme
werke geboren odder nicht, dy gefft deme rade XV groschen
Seite
| Download
| Print |
Textanmerkungen▾ |
Sachanmerkungen▾