Cöllnisches Stadtbuch (Signatur A Rep. 510 Nr. 1), Folio 23 recto
Der Rat zu Cölln bestätigt dem Rat zu Mittenwalde die Ablösung einer
Rentenzahlung an den Altaristen des Erasmusaltars in der Petrikirche, 1460
Wy Borgermeister und Radmanne old unde nye der Stad Coln By olden Berlin gelegen,
Bekennen med dessen unsen open brife vor uns, unse nakomelige und vor allermenniglich,
dy en syn edder horen lesen dat dӱ Ersamen herren Borgermeister und Radmanne der Stad
Middenwolde sodanne Jerlike rente, nemeliken vyr schock ane veffteyn groschen
landwerunge, dӱ sӱ Jerliken unseme altaristen des altaris Sancti Erasmi In Sunte
peters Kercke tu Coln gelegen suszlange gegeven hebben, Dar dӱ Rad von Colen
sulke vorgesreven jerlike rente In dӱ ere des almechtigen godes thu gestifftet hadde, Nu
avegekofft und gentzliken avegeloset hebben und uns vor sulke vorgescreven Jerlike
rente wol tu dancke und guden genuge, so wy dat med em in gutliken fruntliken
dedingen vorlaten und vorscheiden, gegeven, bereydet, betalt und gereyth overgetelt
hebben, twe und vefftig schock groschen und druttig groschen alle landwerunge yo achte
penninge vor isliken groschen, dy wy ok by fromen luden wedder angeleth und andere rente
tu bestedigende den dinst godes tu deme vorgescreven altare weder gekofft hebben und
seggen den Ersamen herren Borgermeistern und Radmannen old und nye der Stad Mid-
denwolde dy nu syn und allen oren nakomelingen sulker vorgescreven summe
geldes und rente vor uns, unse nakomelinge und allermennichlig tu allen tiden
quidt, ledich und los in crafft desses brifes. Also dat sy van uns odder unsen nakome-
lingen noch van deme altaristen des vorgescreven altaris unde alle synen nakome-
lingen umme der vorgescreven summe geldes und rente nuͤmmer meͤhr scholen
angelanget noch gemanet werden, sunder der gentzliken ane allerleye Insage
befryet ledich und los syn in crafft desses brifes ane alle geverde. Unde wy scholen
und willen vor uns und alle unse nakomelinge Em und oren nakomelingen
der avelosunge sulker renten vor sulke vorgescreven summe geldes eyn recht stede
gewere syn vor allermennichlig thu allen tiden ane geverde. Offt ok uns Borgermester
und Radmanne der Stadt Coln odder unsen nakomelingen odder deme altaristen
odder sunst ymande dy briff, dath die Ersamen Borgermeister und Radmanne
der Stad Middenwolde In vortyden van orem Radhuse dy rente thu deme
gnanten altare sancti Erasmi mede vorkofft hebben, tu der hand qweme, dy nü
in crafft des brifes weder avegekofft worden, dy schal vortmehr enkeyne Crafft
hebben und thu ewigen tiden machtelosz bliven ane geverde. Des tu orkunde und
mehr sekerheit hebbe wy unser Stad Colen grotzste Ingesegel med guder Witschap
unde eyndracht neden an dessen briff hengen laten. Na Cristi unses heren gebort
virteynhudert jare und In deme Sestigesten Jare des dinstages in den hiligen
pingesten.
Seite
| Download
| Print |
Textanmerkungen▾ |
Sachanmerkungen▾