|
[V]An deme verndel Stedeghelde.
Du Schalt wethen, dat dy rad van
Colen alle verndel yares eyns nempt
Stedeghelt, Nemlich des fridaghes
vor Sunte Johannis daghe, des fri-
daghes na Sunte michils daghe,
des fridaghes vor unser liven frou-
wen daghe lichtmisse
unde am gu-
den dunredaghe.
So sint dy markte
aller best, denne zo nempt men
van den groten kramen eynen groschen,
van den middelmetighen IIII pennin-
ghe, van den cleynen II denarios, van den
fromden dar na syͤ krame hebben
unde van allen dy dar lynwant,
was, honnichkuͤken, czibollen up
weghenen, brot oder zemelen up
weghenen zellen unde vele hebben
II denarios. Ok nempt men van allen
den Stedeghelt dy dar vele hebben
huͤde, Streͤnghe, Reͤpe, Syckelen,
zezennen, Eczen, Byle, Glaze, Schot-
telen etc., wuͤ men dat alles mach
ghenuͤmen, yo van eynen ydermann II
denarios It sy denne dat fromde geͤste wes
vele hebben up weghennen alze leͤ-
ghele, Glaze, zeven, kruze etc., dyͤ
geven na Irkantisse des rades.
Van dessen nempt men nicht. dyͤ
Bottere, Keze, eyghere in den korven
thu markte draghen, It sy denne
dat sy wes trefflikes van den thu
kope bringhen. Ok en nempt van
men van den kruͤthoͤcschen unde
van den, dy dar afet werck zellen
unde vorkopen, It sy denne dat syͤ
zo vele aftes by sich hebben dat
|
sy it mogheliken dar van geven.
Desghelik Schaltuͤ vornemen
van allen cleyner unnd gherin-
ge kopware alze van Vlassze,
henpe, Smeͤr, talch, Speͤck etc.,
hebben sy des wenich thu kope,
zo nempt men dar van nicht.
Ever kan men merken dat sy it ge-
ven konen, So nempt men van
eynen ydermanne II denarios.
Upp dy selve tyt zo gheit men
In dat Schuͤhuͤsz, dar nempt men
van eynen ydermanne XII denarios alze
vor ys gheschreven unde dat gelt
bringhet men In eyner Summa
unnd men geft deme Schrivere up
eyne Jewelike tyͤt eynen groschen
unde den dren Ride knechten dy
med den heren na dat stedeghelt
gan, ok up eyne Islike tyͤt I groschen
Ok nempt men up dy Jaͤrmarkt
Stedegelt, unde wuͤ men dat
nemen Schal, duͤr van heth men
eyn Sunderlich parmynten re-
gister, dat ys hir by den anderen
bukeren unnd registren dar vindet
men Stuczkwyze eyn na den andern,
wu unnd van wene men dat
Schal nemen. Unde ys nicht
not hyr ynne uterlich tu vorteken.
Item
gifflick wantsnider van Berlin
und Colenn gefft up laurenty
VI groschen
unnd die Lakenmaker II denarios.
Item Erasmus lowe van der writzenn
gefft III groschen. Die
von middenwolde
geven II groschen, dann die unnser
muthen ok dar II groschen geven.
|
Seite
| Download
| Print |
Textanmerkungen▾ |
Sachanmerkungen▾